Қазақстанда жастарды мемлекеттік қызметке тарту және олардың кәсіби дамуына жағдай жасауға ерекше мән берілуде. Бұл бағыт Қазақстан Республикасының мемлекеттік қызметін дамытудың 2024–2029 жылдарға арналған тұжырымдамасында айқындалған басым міндеттердің бірі.

2026 жылғы 1 шілдеден бастап күшіне енген «Қазақстан Республикасының мемлекеттік қызметі туралы» жаңа заңға сәйкес, жоғары оқу орындарын GPA көрсеткіші 3,33-тен төмен емес нәтижемен тәмамдаған түлектер оқуын аяқтағаннан кейін бір жыл ішінде ауылдық елді мекендердегі, аудандардағы және облыс орталығы болып табылмайтын қалалардағы мемлекеттік органдардың басшы емес лауазымдарына конкурстық іріктеусіз қабылдана алады.

Бұған дейін мұндай мүмкіндік тек мемлекеттік білім беру гранты негізінде білім алған түлектерге берілсе, жаңа заң бұл талапты кеңейтіп, оқыту нысанына қарамастан білімді әрі қабілетті жастарға мемлекеттік қызмет жолын бастауға мүмкіндік берді.

Бұл жаңа тетіктің Абай облысында да алғашқы нәтижелері бар. Бүгінде Қазақстан Республикасы Мемлекеттік қызмет істері агенттігінің Абай облысы бойынша департаментімен келісу арқылы 43 түлек конкурстық іріктеусіз мемлекеттік қызметке тағайындалды.

Олардың ішінде:

• Жаңасемей ауданына – 9 түлек;
• Жарма ауданына – 6 түлек;
• Бесқарағай ауданына – 4 түлек;
• Үржар ауданына – 3 түлек;
• Аягөз ауданына – 2 түлек;
• Ақсуат, Абай, Көкпекті аудандары мен Курчатов қаласына – 1 түлектен жұмысқа орналасты;
• тағы 15 түлек аумақтық департаменттердің аудандық бөлімшелеріне қызметке қабылданды.

Сонымен қатар ауылдық жерлерде еңбек етуді таңдаған жас мамандарға «Дипломмен – ауылға» жобасы аясында мемлекеттік қолдау көрсетіледі. Бағдарлама шеңберінде 100 АЕК мөлшерінде біржолғы көтерме жәрдемақы, сондай-ақ тұрғын үй сатып алуға немесе салуға аудан орталықтарында 2500 АЕК-ке дейін, ал басқа ауылдық елді мекендерде 2000 АЕК-ке дейін бюджеттік кредит қарастырылған.

Мұндай шаралар жастардың еңбек жолын туған өңірінде бастауына, ауылдық жерлерге білікті мамандар тартуға және мемлекеттік қызметтің кадрлық әлеуетін нығайтуға мүмкіндік береді.

Жастарға жол ашу – мемлекеттік қызметтің сапалы әрі заманауи кадрлармен толығуына жасалған маңызды қадам. Білімді, белсенді және жауапты жас мамандардың мемлекеттік басқару жүйесіне келуі өңірлердің дамуына жаңа серпін беретіні сөзсіз.

Қосымша ақпарат алу үшін:

Мекенжайы: Семей қаласы, Ж.Аймауытов көшесі, 143А, Бизнес және сервис колледжінің ғимараты, 2-қабат, 208-кабинет.
Жұмыс уақыты: дүйсенбі–жұма, 09:00–18:30. Түскі үзіліс: 13:00–14:30.
Байланыс телефондары: 8 (7222) 35-41-62, 8 (7222) 35-41-72.