Қазақстан Республикасының жаңа Конституциясында елдің халықаралық аренадағы ұстанымы мен сыртқы саясатының негізгі бағыттары айқындалған. Атап айтқанда, Ата Заңның 10-бабы мемлекеттің халықаралық құқық нормаларын құрметтеуіне, бейбітшілік пен ынтымақтастықты нығайтуына басымдық береді.

Жаңа Конституцияның 10-бабында:

«Қазақстан Республикасы халықаралық құқық қағидаттары мен нормаларын құрметтейді, мүдделі мемлекеттермен бейбітшілік пен ынтымақтастықты, олардың ішкі ісіне араласпауды, халықаралық дауды бейбіт жолмен шешуді көздейтін сыртқы саясат жүргізеді», – деп жазылған.

Аталған бап Қазақстанның халықаралық қатынастардағы негізгі ұстанымдарын құқықтық тұрғыдан бекітеді. Оның мазмұнына сәйкес, еліміз өзге мемлекеттермен қарым-қатынаста өзара құрмет, бейбіт келісім және ынтымақтастық қағидаттарын басшылыққа алады.

Сонымен қатар бұл норма мемлекеттердің егемендігі мен ішкі саяси мәселелеріне құрметпен қараудың маңызын көрсетеді. Яғни Қазақстан халықаралық дауларды күш қолдану арқылы емес, дипломатиялық келіссөздер мен бейбіт тетіктер арқылы шешуді қолдайды.

Сараптамалық тұрғыдан алғанда, 10-бап Қазақстанның халықаралық қоғамдастықтағы бейбітсүйгіш мемлекет ретіндегі ұстанымын және көпжақты ынтымақтастыққа бейілділігін конституциялық деңгейде айқындайды.

Бұл баптың маңызы қазіргі күрделі геосаяси жағдайда арта түседі. Әлемде мемлекеттер арасындағы саяси және экономикалық қайшылықтар күшейіп, халықаралық қауіпсіздік мәселелері өзекті болып отырған тұста Қазақстанның бейбітшілік пен дипломатиялық диалогты қолдауы маңызды рөл атқарады. Мұндай ұстаным еліміздің халықаралық аренадағы беделін нығайтып, өзге мемлекеттермен сындарлы байланыс орнатуына мүмкіндік береді.

Сондай-ақ 10-бап Қазақстанның сыртқы саясаттағы сабақтастығын сақтауға және халықаралық қатынастарда болжамды әрі сенімді серіктес болуына негіз қалайды. Мемлекеттер арасындағы өзара құрмет, тең құқықтылық және ортақ мүддеге негізделген ынтымақтастық елдің ұлттық мүддесін қорғаумен қатар, өңірлік және жаһандық тұрақтылықты қамтамасыз етуге де ықпал етеді.