Аягөз қаласының орталық алаңында әскери ант қабылдау рәсімі өтті. Салтанатты шарада «Шығыс» өңірлік қолбасшылығына қарасты Аягөз гарнизонының танк және артиллерия әскери бөлімдеріне еліміздің он өңірінен келген 300-ге жуық жас сарбаз Отан алдындағы борыштарын адал өтеуге ант қабылдады.

Елдің қауіпсіздігін қорғау үшін әскерге алынған әрбір азаматтың өміріндегі ең маңызды қадамдардың бірі – әскери ант қабылдау. Аталмыш шараға қатысқан әскери бөлімдердің басшылары, аудан әкімінің орынбасары және ауған соғысының ардагерлері, ата-аналар жас сарбаздарға тілектерін айтып, сын сағатта сыр бермей, Отан алдындағы борышын абыроймен атқаратындығына сенім білдірді. 

​Әскери өмірдің табалдырығын жаңа аттаған боз балалар бір ай көлемінде арнайы әзірленген жоспар негізінде алғашқы әскери өмірге бейімделіп, саптық жүріс пен әскери іске машықтанды. Дайындық барысында жас сарбаздар алдағы бір жыл бойы өткеретін қызметінің  ережелері мен міндеттерін, жалпы әскери жарғылардың өздеріне қатысты қағидалары жайлы тәлім алды. Енді олар алған білімін тәжірибе жүзінде қолданбақ.