Мәжіліс депутаты Нұртай Сабильянов Үржар ауданында
3 шілде күні ҚР Парламенті Мәжілісінің депутаты, «AMANAT» партиясы фракциясының мүшесі Нұртай Сабильянов Абай облысына іс-сапармен келді.
ҚР Парламенті Мәжілісінің депутаты Нұртай Сабильянов Абай облысы тұрғындарымен кездесулерін Мақаншы ауылынан бастады. Сөз басында ел қалаулысы ауыл тұрғындарымен кездесудегі басты мақсат сайлаушылармен кездесу, олардың өтініштері мен ұсыныстарын жинау, халықтың мәселелерін шешуге жәрдемдесу, пікірлерімен бөлісу және партияның Сайлауалды бағдарламасының облыстық Жол картасының орындалуын бақылау екенін атап өтті.
Кездесу барысында Мақаншы тұрғыны Әбен Разуев Мақаншы өңірінің ахуалын жақсарту мақсатында ауданды құру жұмыстарын тездетіп бастау туралы ниетін білдірді.
Ауыл тұрғыны Тұрғали Қалықжанов Мақаншыға газ құбырының тартылуын сұрап отыр. Сондай-ақ ауылдық елді мекендерде шаруалардың негізгі айналысатын кәсібі мал шаруашылығы мен егін шаруашылығы болғандықтан, осы бағытта механизатор, мал бағушы сияқты ауыл шаруашылығындағы мамандардың жоқтығы қынжылтады.
Сайлаушылардың қойған сұрақтарына депутат өз жауабы мен түсіндірмесін берді. ҚР Парламенті Мәжілісінің депутаты Нұртай Салихұлы Парламентте елді-мекендердегі инфрақұрылымды дамыту мәселесі көтерілгенін, ал газдандыруға қатысты сұраққа бүгінгі күні көгілдір отынмен қамту мәселесі энергетика министрлігінде қарастырылуда екенін айтып өтті.
Нұртай Сабильянов тұрғындармен кездесулерден кейін азаматтарды жеке мәселелері бойынша қабылдады.
Сонымен қатар Мәжіліс депутаты Үржар ауданына жұмыс сапары аясында Малақ ауылындағы сумен жабдықтау нысандарының құрылысы мен жұмыс барысымен танысты.
Үржар ауданының сәулет, қала құрылысы және құрылыс бөлімінің бас маманы Самат Маусымбаев Малақ ауылындағы су құбыры желілері мен су тарту құрылыстарын салу жұмыстарына техникалық қадағалау қызметі бойынша конкурс нәтижесі қайта қаралып жатқанын, жұмыстарды бастау шешім шыққан соң басталатынын атап өтті. Желінің ұзындығы 8,933 шақырым, ұңғыманың тереңдігі 55 м. «НАЗ» жауапкершілігі шектеулі серіктестігі мердігер мекеме өкілінің айтуынша, нысан бойынша жұмыс қазан айына дейін аяқталады.
Келесі кездесулерді Мәжіліс депутаты Үржар ауданының Жоғарғы Егінсу, Айтбай, Таскескен ауылдарында, Ақсуат ауданының Қызыл-Кесек, Құмқөл, Танамырза ауылдарында, Көкпекті ауданының Көкпекті, Шәріптоғай, Шұғылбай, Биғаш ауылдарында, Жарма ауданының Шар қаласы, Қалбатау ауылдарында, Аягөз ауданының Тарбағатай, Сарыарқа, Қарағаш, Малкелді, Баршатас, Байқошқар ауылдарында, Абай ауданының Қарауыл, Архат, Қасқабақ ауылдарында, Семей қаласында жалғастырады.