2023 жылдың 23 сәуір күні Аягөз аудандық білім бөлімі, аудандық мәдениет, тілдерді дамыту, дене  шынықтыру және спорт бөлімдерінің ұйымдастыруымен №5 орта мектебінің әкімішілігі, ұжымы ҰОС 78 жылдығына арналған оқушылар арасындағы ағайынды Измайловтар атындағы жеңіл атлетикалық эстафета жарысын өткізді. Спорт түрінің ханшайымы -  жеңілатлетика, қандай  жарыстың да көркі екені белгілі. Ауа – райы тамаша болып, оқушылар эстафеталық  жүгірісте  барларын салды. Орталық көшелерден өткен жарыс – нағыз шоу болды десе, артық  айтқан  емес. Көп жылдар бойы  № 1 орта мектебінің әкімшілігі, ұжымы өткізген жарыс, 2017 жылдан бастап, эстафета сияқты әр жылы, әр мектеп өткізетін болып шешілді. Осы жылы №5 орта мектебі жарысқа  тыңғылықты дайындалып, жоғарғы дәрежеде өткізуге ат салысты.

Ашылу салтанатында №5 орта мектебінің директоры Л. Молдашева ұйымдастырушыларға  алғыстарын білдіріп, оқушыларға тәрбие берудегі маңызы зор екенін айтып, салауатты өмір салтын насихаттаудағы еңбек екенін айтып, сәттілік тіледі.

Қыздар сөре сызығына тұрып, секундомерлер қосылып, командалар жарыс жолына шықты. Екінші  кезекте ұлдар командалары жарыс жолына шықты. Ұзындығы 250 метрден 800 метрге дейінгі 12 кезеңнен тұратын жеңілатлетикалық эстафета қыза түсті. Ұлдар арасында №5 орта мектебінің  командасының мерейі үстем болып жеңімпаз атанса, ІІ орынды көбейінді қазақ мектеп гимназия командасы, ІІІ орынды  №1 орта  мектебінің командасы иеленді. Қыздар арасында 1 орынды көпбейінді қазақ мектеп гимназиясы командасы, 2 орынды №1 орта мектебінің командасы, 3 орынды Д. Бабатайұлы атындағы орта мектебінің командасы иеленді.

Жеңіске жеткен командалар  жарыс соңында аудандық  мәдениет, тілдерді дамыту, дене  шынықтыру және спорт бөлімінің ауыспалы кубоктарымен, мақтау қағаздарымен марапатталды. Марапаттауларды аудан әкімінің орынбасары Н. Көпжасаров, аудандық білім бөлімінің басшысы Н Азимбаев табыстады.