Астанада мемлекеттік органдар өкілдерінің, депутаттардың, отандық және шетелдік ғалымдардың, мемлекет және қоғам қайраткерлерінің, музей қызметкерлерінің және еліміздің барлық өңірлерінен келген жас зерттеушілердің қатысуымен Қазақстанның музей қызметкерлерінің I конгресі өтуде.

Іс-шара жетістіктерді насихаттау, музей ісін дамыту, музейлердің ғылыми-зерттеу, мәдени-білім беру қызметін жетілдіру, олардың елдің тарихи-мәдени мұрасын сақтаудағы рөлін арттыру мақсатында өткізілуде.

Конгресс шеңберінде «Өзбекәлі Жәнібеков мұрасы және музей ісі» халықаралық ғылыми-практикалық конференциясы ұйымдастырылады. Онда қатысушылар музейтану, мәдениеттану, этнография, тарихи-мәдени мұра ескерткіштерін қорғау саласындағы өзекті мәселелерді талқылайды.

«Өзбекәлі Жәнібеков мұрасы» көрмесінде қатысушылар көрнекті ғалымның өмірі мен шығармашылығы туралы баяндайтын ҚР Ұлттық музейі мен «Әзірет Сұлтан» музей-қорығының қорларынан бірегей музей заттарымен және коллекцияларымен танысты.

«Музей заттарын консервациялау және реставрациялау» семинар-практикумының алаңында музей заттарын консервациялау, реставрациялаудың теориялық, практикалық-әдіснамалық мәселелері талқыланады.

Конгресс бағдарламасын «Мәдени мұра» журналының 20 жылдығына арналған шығармашылық кездесу аяқтайды.