Бүгін Абай ауданының активімен өткен кеңесте облыс әкімі Нұрлан Ұранхаев еліміздегі алғашқы әкімдер мен қалаларды сайлау нәтижесінде сайланған ауданның жаңа басшысын таныстырды.

Қазақстан Республикасының «Сайлау туралы» Заңына сәйкес ауданның аумақтық сайлау комиссиясының сайлау қорытындылары негізінде Мейіржан Серікбосынұлы Смағұлов Абай ауданының әкімі қызметіне сайланды.

Мейіржан Смағұлов еңбек жолын бас маман ретінде бастап, мемлекеттік қызметтің барлық сатыларынан кезең-кезеңімен өтті. Ол бұған дейін ауылдық округ әкімі, сондай-ақ аудан әкімінің орынбасары қызметтерін атқарған.

Өңір басшысы Нұрлан Ұранхаев өткен сайлау - демократиялық, әлеуметтік және құқықтық бағытын таңдаған ел үшін дамудың жаңа кезеңі басталғандығын атап өтті. Ол сондай-ақ жаңа басшыны құттықтап, оның қызметіне сәттілік тіледі.

Кеңес барысында Нұрлан Ұранхаев ауданның бұрынғы әкіміне ауданның дамуына қосқан үлесі үшін алғысын білдіріп, облыстағы жұмысын жалғастыратынын атап өтті.