Бүгін қала әкімі Нұрбол Нұрсағатов Абай облысы электр желісі станциясының мамандарымен бірге Шығыс оң жақ № 5,6,7,9 саяжай массивіне барып, жаңадан орнатылатын трансформаторлық қосалқы станциян салу жұмыстары туралы көшпелі кеңес өткізді.

2024 жылы аталған саяжайларда электрмен жабдықтау көлемін ұлғайту мақсатында, 4 жаңа трансформаторлық қосалқы станция орнатылады. 

Бұдан бұрын, қала әкімі осы саяжай алабының тұрғындарымен түрлі мәселелерді шешу бойынша бірнеше рет кездесулер өткізген болатын. Онда тұрғындар электрмен жабдықтаудың өте әлсіз екендігін, жарықтың жиі сөніп қалатындығына шағымданған болатын.

Осы олқылықтарды жою мақсатында Семей қаласының әкімдігі арнайы қаражат бөліп, кабельдерді ішінара ауыстыру, трансформаторлық майларды, 630 амперлік автоматтарды, фидерлерді ауыстыру, сондай-ақ фазалардың қисаюына жол бермеу үшін КТПН-ға жүктемелерді қайта бөлу бойынша жұмыстарды жүргізуді жоспарлауда.