Абай облысында «Мектебім - мейірім мекені» атты салтанатты шара өтті. Облыс бойынша бүгін 10 мыңнан астам бала мектеп табалдырығын аттады.
Жаңа оқу жылының басталуы қарсаңында білім алушылардың бойында жағымды көңіл-күй қалыптастыруда алғашқы қоңыраудың маңызы зор. Биыл 1-сыныпқа қадам басқан бүлдіршіндер мен 11-сынып оқушылары үшін алғашқы қоңырау соғылды.
Бородулиха ауданы Ә. Бөкейхан атындағы қазақ орта мектебінде алғашқы қоңырау салтанаты шарасына Абай облысы әкімінің орынбасары Жасұлан Сарсебаев қатысты:
«Мемлекет басшысы Қасым-Жомарт Тоқаевтың білім саласын дамытуға ерекше көңіл бөлуі нәтижесінде елімізде білім беру жүйесін жаңғырту жалғасуда. «Қазақстан Халқына» қорының қолдауымен жүзеге асырылған «Ауылдық аймақтардағы тірек мектептердің әлеуетін арттыру» жобасы аясында, биылғы оқу жылында Бородулиха ауданының Ә. Бөкейхан атындағы қазақ орта мектебі 26 оқу кабинетімен, кітапханамен және спорт залы, шеберханалармен жабдықталды. Биылғы оқу жылын 323 оқушы және 39 жоғары білімді мұғалім қарсы алуда. Оқушылардың республикалық, облыстық олимпиадаларда жеңіске жетіп жүргені мақтауға лайық. Ұстаздардың кәсібилігі мен тәжірибесі арқылы, білім беру жүйеміз одан әрі табысты дами беретініне сенімдімін. Жаңа оқу жылы білімге құштар жастарымыз үшін жемісті болып, Абай облысының мерейін арттырсын!» – деді әкім орынбасары.
Ы.Алтынсарин атындағы №37 гимназияда өткен алғашқы қоңырау салтанатты шарасына Абай облысы білім басқармасының басшысы Нұржан Ахметқалиев қатысты. Ұстаздар қауымы мен жаңа оқу жылына жаңа қадам басқан бүлдіршіндерге сәттілік тілеп, оқу жылының басталуымен құттықтады.
«Халқымыздың «Бақыттың жолын білім ашар» деген дана сөзі қай заманда да маңызын жойған емес. Білім беру жүйесін жаңғырту мақсатында мемлекетімізде ауқымды жұмыстар атқарылуда, заманауи нысандар бой көтеріп, инновациялық әдістер қолданысқа енуде. Биыл облысымызда 5 жаңа мектеп есігін айқара ашса, алдағы 2 жылда 7 мектептің құрылысы басталады. Жаңа оқу жылында 10 мыңнан астам бүлдіршін мектеп табалдырығын алғаш аттап, білім әлеміне жол ашадя, ал 5 мыңнан астам түлек алтын ұя мектебімен қоштасып, үлкен өмірге қадам басады. Ұстаздарымыздың кәсібилігі мен мол тәжірибесі – өңіріміздің білім беру саласын жаңа белестерге көтерер басты негіз. Алдағы оқу жылы да толағай табыстар мен игі істерге толы боларына кәміл сенемін», - деді Басқарма басшысы
Білім күніне арналған мерекелік шарадан кейін барлық мектепте сынып сағаттары өтті. Тәрбие сағаттарында ұлттық құндылықтардың, патриотизмнің, адалдықтың, адам өміріндегі бір-біріне деген құрмет пен сенімнің рөлін талқылауға ерекше назар аударылды.
2 қыркүйек, жаңа оқу жылының бірінші күні, барлық мектепте «Менің Отаным - Қазақстан» бірыңғай сынып сағаты өтеді. Ары қарай сабақ кестеге сәйкес жалғасады.
Техникалық және кәсіптік, орта білімнен кейінгі білім беретін оқу орындарында барлық курс білім алушылары үшін «Білімге ұмтылу, еңбексүйгіштік және патриотизм» тақырыбында кураторлық сағаты ұйымдастырылады.
