Әкімшіліктің жақсылығын, игілігін  көріп отырған бір ауыл бар. Аягөз ауданына қарасты Тарбағатай ауылының тұрғындары қолы шаруадан қалт босай қалса, әсіресе мектеп оқушылары осы әкімшіліктің маңына жиналады. Өйткені бұл жердегі Wi-Fi мен әлеуметтік желіге кіріп, алыстағы ағайынмен хал сұрасып, елдегі жаңалықтардан құлағдар болып қалады. Әрине біраз адам жиналса, интернет мүлдем ұстамай қалады. Бүгінде ауылдың тұрғындары 21-ші ғасырда цифрлі технологияның қызығын көре алмағандықтан, туған жерінен көшіп жатқандардың соңғы кездері саны артып келеді. Мәселен 2022 жылы 25 отбасы Тарбағатай ауылынан, басқа елді мекенге қоныс аударған. Ал ауыл әкімі Ербол Ережеповтың айтуынша, осы мәселе бойынша байланыс операторларына талай мәрте хат жазылған. Алайда нәтиже жоқ деп отыр. 

Ұялы байланыс операторының базалық стансасы демекші, Президент сайлауына дейін  Тарбағатай ауылында ғаламтор болады деп тұрғындарды бір сендіріп, үміт отын жаққан еді. Бірақ  қазіргі уақытта стансаның тек іргесі ғана тұрғызылған. «Айта-айта Алтайды, Жамал апам қартайды»,- деп мұңын шақты жергілікті тұрғындар. 

Ауыл адамдары ауырып, ем іздеп жергілікті амбулаторияға барған ғаламтордың жоқтығынан тағы бір әуреге түседі. Ауылдағы аурухана қызметкерлері науқастарды тіркеп, ауданға жолдама беру үшін әкімдік ғимаратына баруға мәжбүр. Бірақ интернет жылдамдығының нашарлығынан бір адамды 10-15 минут тіркеудің орнына, сағаттап отырады.  Сондықтан кей кездері жағдайы нашар науқастарды сағаттап тіркеу қиынға түсуде. Осылайша Абай облысына қарасты Тарбағатай ауылының тұрғындары интернеттің жоқтығынан қиындық көріп, еститін үкімет, ғаламтормен қамтамасыз етіп берсе екен дейді.

Қуаныш Рахметоллаұлы