Семей қаласының сол жағалауында орналасқан Мұхтар Әуезов алаңында қайта жаңғырту жұмыстары қарқынды жүргізілуде.

Жаңғырту аясында тозығы жеткен тас төсеніштерін ауыстыру, балалар алаңын жаңарту және қосымша жарықтандыру орнату жоспарланған. Сондай-ақ, ескерткіш орнатылған тұғырды жөндеу көзделуде.

Қала әкімі Нұрбол Нұрсағатов ТКШ бөлімінің басшысы және мердігерлермен бірге алаңды аралады. Әкім алаңды жөндеудің мақсаты – уақыт өте келе жоғалған көріктілігі мен лайықты бейнесін қалпына келтіру екенін атап өтті.

«Әуезов алаңының ағымдағы жөндеу жұмыстарына қатысты айта кетейін: тұрғындардан тас төсеніштерін ауыстыру жөнінде көптеген өтініштер түсті. Бұл алаң сол жағалаудағы басты алаңдардың бірі болып саналады. Қала басшылығының тапсырмасы бойынша қоғамдық кеңістіктерді жөндеу аясында 5 мың шаршы метрден астам тас төсеніштері ауыстырылатын болады. Сонымен қатар, мұнда жаңа жарық шамдарын орнату да жоспарланған», – деді ТКШ бөлімінің басшысы Нұрлан Сергазинов.