Аягөз ауданына қарасты Тарбағатай ауылында «Batyr Bolamyn» қорының бастамасымен және «Қазақстан халқына» қорының демеушілігімен балаларға арналған шағын спорт кешені ашылды. Бұл кешен шалғай ауылдарда спортты дамытуға бағытталған ірі жобалардың бірі болып табылады.

«Batyr Bolamyn» қоры бүгінге дейін 70-тен астам спорт залын ашып, көп балалы және әлеуметтік осал топтардың балаларына бокс, қазақша күрес, дзюдо, баскетбол, шахмат, тоғызқұмалақ сияқты спорт түрлерімен тегін айналысуға мүмкіндік берді. Сондай-ақ, спорттық жабдықтармен қамтамасыз етіп, ауыл балаларына дене шынықтырумен еркін айналысуға жағдай жасады.

Спорт кешенінің ашылу рәсіміне «Batyr Bolamyn» қорының президенті Ернұр Сәбікенұлы, Аягөз ауданы әкімінің орынбасары Ерлан Молдашев және ауыл тұрғындары қатысты. Шарада қор басшылығына көрсеткен қолдауы үшін дәстүр бойынша шапан жабылып, алғыс білдірілді.