Биылғы жылдың үлесіндегі атаулы датаның бірі – Жеңістің 80 жылдығы. 1941-1945 жылдарды қамтыған II дүниежүзілік соғыстың қазақ тарихында да алар орны бар. Бауыржан Момышұлы, Талғат Бигелдинов, Қасым Қайсенов, Нұркен Әбдіров секілді аты аңызға айналған тұлғалардың қаһармандық болмысы бүгінгі ұрпаққа да жақсы мәлім. 

Осыған орай Семей қалалық Мәдениет сарайында қалалық ардагерлер кеңесінің ұйытқы болуымен «Ерлікке – тағзым, ұрпаққа –үлгі» атты патриоттық мәні зор шара өтті. Шараға тыл ардагерлері, қазыналы қарттар, ел құрметіне бөленген ақсақалдармен қатар әскери қызметшілер, сарбаздар, студент жастар қатысты. 

Еліміздің мемлекеттік әнұранымен ашылған ғибраты мол жиынды қалалық әкімдіктің аппарат басшысы Нұржан Есенжолов ашты. 

Шара барысында Шәкәрім атындағы мектеп-гимназиясының оқушылары дайындаған сахналық көріністің жиналған қауымға қалдырған әсері зор болды. Дарынды жастар Әлия Молдағұлова, Мәншүк Мәметова, Баян Байғожина сияқты қан майданда ерлік көрсеткен қазақтың қаһарман қыздарының болмысын паш етіп, оларға арнаған өлеңдерін тебірене жеткізді. 

Қосымша айта кетсек, Семей қалалық ардагерлер кеңесінің 25 президиум мүшесі және 162 (құрамында 27153 адам) ардагер  бастауыш ұйыдары бар. Оған қоса 57326 зейнет жасындағы аға буын өкілдері тұрады.