Абай облысының әкімі Берік Уәли ұсынған «Бейбітшілік» аралында шолу дөңгелегін салу бастамасы – Семей қаласының мәдени және туристік әлеуетін арттыруға бағытталған сәтті идея. Бұл жоба қала тұрғындары мен қонақтарына табиғаттың ғажап көріністерін тамашалауға мүмкіндік беріп қана қоймай, Семейдің символдық келбетін жаңғыртуға оң ықпалын тигізбек.

«Бейбітшілік» аралы – тарихы тереңде жатқан ерекше мекен. Бұрын «Түйемойнақ» аталып, қазақ зиялыларының бас қосқан қасиетті орны болған арал бүгінде жаңа өмірге қадам басып келеді. Соңғы жылдары мұнда демалыс орындары, балалар ойын алаңдары мен спорт алаңдары пайда болды. Енді шолу дөңгелегінің бой көтеруі аралды толыққанды демалыс және туристік орталыққа айналдырады.

Бұл жерден Семей қаласының ең көрікті жерлері айқын көрінетін болады. Құс ұшар биіктіктен қарағанда, алып Ертіс өзені мен қос жағалауды жалғап тұрған аспалы көпір, сәулетті ғимараттар мен табиғаттың тамаша көрінісі көз тартары сөзсіз. Кешкі уақытта қаланың жарқыраған шамдары мен өзеннің айнадай суы ерекше әсер сыйлайтыны анық.

Әлеуметтік желіде мұндай бастамаларды сынға алу жиі кездеседі. Дегенмен, дамыған қалалардың тәжірибесіне назар аударсақ, шолу дөңгелектері туристерді тартатын маңызды нысан екенін көреміз. Алматыдағы «Көктөбені», Лондондағы «London Eye» немесе Париждегі «Grande Roue de Paris» аттракционын мысалға алсақ, олардың қаланың туристік бет-бейнесін қалыптастыруда үлкен рөл атқаратынын байқаймыз.

Сондықтан бұл жобаны жүзеге асыруға облыс әкімдігімен қатар, белді кәсіпкерлердің де атсалысуы аса маңызды. Жеке инвестициялар тарту арқылы жоба бюджетке салмақ түсірмей, оны қысқа мерзімде іске асыруға мүмкіндік береді. Кәсіпкерлер үшін де бұл – келешекте экономикалық тиімділік әкелетін, әрі қаланың дамуына үлес қосатын игі бастама.

Шолу дөңгелегі – жай ғана аттракцион емес, ол қаланың көркін арттыратын, туристерді қызықтыратын, тұрғындарға ерекше демалыс сыйлайтын символдық нысан. 

«Бейбітшілік» аралының тарихи маңызын ескере отырып, оның жаңа заманға сай қайта жандануы – орынды қадам. Бұл бастама Семейдің жаңа деңгейге көтерілуіне ықпал ететін маңызды жобалардың бірі болмақ. Ендігі кезекте, қоғам мен кәсіпкерлер бірлесіп, осы игі істің жүзеге асуына атсалысуы қажет.

Біреудің мінін көргенше,

Жамандығын тергенше,

Өз ойыңды мазалап,

Өз бойыңды тазалап,

Өзіңмен күрес өлгенше!

Шәкәрім ҚҰДАЙБЕРДІҰЛЫ

Сырттан отырып тон пішкеннен гөрі, игі бастамаларға қуана білейік. Семейдің көркеюі – баршамыздың ортақ игілігіміз. Қала дамыса, тұрғындарға жайлы өмір, келер ұрпаққа көрікті мекен қалады. Әр жаңа жобаны сынаудан бұрын, оның мүмкіндіктерін көре білу – жауапты азаматтықтың белгісі.