Абай гарнизоны әскери қызметшілерінің балалары Балхаш қаласындағы «Балдәурен» республикалық оқу-сауықтыру орталығына аттанды. Бұл жолы әскерилердің 20-ға жуық баласы сауықтыру лагерінде тынығатын болады. 

Балаларды теміржол бекетінен «Шығыс» өңірлік қолбасшылығы әскерилері қолбасшысының әскери қызметкерлердің отбасы мүшелерімен жұмысты ұйымдастыру қызметінің жетекшісі Ақмарал Ахметжанова мен ата-аналар шығарып салды. 

Балаларға демалуға  мүмкіндік беріліп отырғанына алғысын білдірген Балым Қуанышқызы  лагерге алғаш рет барып отырғанын айтады.  Қаладағы №9 мектептің оқушысы Балым орталықта бос уақытын тиімді өткізетініне сенімді.

Әскери қызметшілердің балалары Балқаш қаласындағы оқу-сауықтыру орталығында мектеп бағдарламасы бойынша білім алады. Сонымен қатар жасөспірімдерге сауықтыру және патриоттық тәрбие беру мақсатындағы шаралар өткізіледі. Айта кетейік, балалардың жазғы демеласы еліміздің Қорғаныс және Білім министрліктерінің жастарға әскери-патриоттық тәрбие беруді жетілдіру жөніндегі бірлескен жоспары аясында жүзеге асырылуда

Абай өңірлік гарнизонының баспасөз қызметі