Семейліктер күні кеше не күлерін, не жыларын білмейтін тосын оқиғаның куәсі болды. Әлдебір азаматтың иелігіндегі жылқының қараусыз қалғандықтан, қала көшелеріне шығып кетіп, жұртты әбігерге түсірген көрінісі әлеуметтік желі арқылы демде тарады. Тарап кеткені өз алдына Абай көшесімен жүйткіп келе жатып, жаяу жүргіншілер жолынан өтіп бара жатқан егде жастағы әйел адамды қағып өтіп, құлатып кетті. Есі шыға елірген жылқы одан ары өтіп барып, автокөлікке соғылып, жол-көлік оқиғасына себепкер болғаны жұртты дүр сілкіндірді. 

Таңғаларлығы сол, «жұлдызға айналған» жылқы қала көшелерінде екі күн емін-еркін жүргенін айтушылар да бар. Бір видеода Неке сарайының алдында жатқаны түсіп қалыпты. Тіпті, қала халқы «ескі көпір» атап кеткен көпір үстімен желе-жортып бара жатқаны біреулерге күлкілі көрінсе, біреулерге түрпідей тиді. Қызық болғанда, жылқының бұл жүрісі қала әкімі Талғат Мұратовтың көпір апатты жағдайда тұрғандықтан, көлік қозғалысын екі қатарға қысқартуға тура келген мәлімдемесімен қатар келді.

Хош, сонымен, айтып айтпай не керек, полиция қызметкерлері қоғам белсенділерімен және «Автомобилистерге қолдау көрсету қоғамы» қоғамдық бірлестігінің көмегімен жабылып жүріп жылқыны қолға түсірді. Алайда, жоғарыда айтқанымыздай әйел адамды құлатып, автокөлікке зақым келтірді. Ал, жылқы қазір иесіз малдарға арналған айып тұрағында. 

Осы оқиғаға қатысты түсінік берген Абай облыстық полиция департаментінің мәлімдеуінше, қазір қараусыз шығып кеткен жылқының иесін анықтау жұмыстары жүргізіліп жатыр. Анықталған жағдайда мал иесі қолдағы жануарларды күтіп-бағу ережелерін бұзғаны үшін әкімшілік жауапкершілікке тартылады. Сонымен қатар, ол зардап шеккендерге келтірілген шығынды өтеуге міндеттеледі.

Қосымша айта кетсек, өңірде иесіз малды бақылауға алу мақсатында арнайы айып тұрақтарын ашу жұмыстары жалғасып жатыр. Қазір айып тұрағының саны 148-ге жеткен.

Айта кетейік, әлеуметтік желіде «жұлдызға айналған» жылқының қатты екпінмен көлікке соғылуы салдарынан тұрақта мерт болғаны туралы ақпарат тарады. Ал зардап шеккен әйел Жедел жәрдем ауруханасында дәрігерлер бақылауында емделіп жатыр.