Семей қаласының орталықтандырылған кітапханасында Ұлыстың ұлы күні – Амал мерекесіне арналған «Нұр себеле, Ұлыстың ұлы күні!» тағылымды кеш өтті. Көне дәстүрімізді жаңғыртып, елдің ынтымағы мен бірлігін дәріптеген бұл мерекелік шарада ұлттық салт-дәстүрлер ұлықталып, өнер мен руханият тоғысты.

Іс-шараға «Ертіс толқындары» ансамблі, М.Төлебаев атындағы музыка училищесінің талантты студенттері, кітапхана оқырмандары мен қала тұрғындары қатысты. Ансамбль мүшелері әсем әндерімен көпшілікке көтеріңкі көңіл күй сыйласа, училище студенттері режиссер Болат Қамзиннің жетекшілігімен театрландырылған «Қауышу» қойылымын ұсынып, көктем мерекесінің рухын айшықтай түсті.

Сонымен қатар, қазақтың көнеден келе жатқан ғұрыптарының бірі – тұсаукесер рәсімі көрсетілді. Ұлттық тағамдарды насихаттауға бағытталған «Baursak Day» шеберлік сағаты ұйымдастырылып, келген қонақтар бауырсақ пісіріп, оның жасалу әдістерімен танысты. Көпшілік Наурыз көжеден дәм татып, қазақтың дәстүрлі тағамдарынан ауыз тиді.

Кітапхана қабырғасында «Қазақ халқының құндылықтары» атты кітап көрмесі ұйымдастырылып, ұлттық мәдениетіміз, салт-дәстүріміз, қазақтың бай мұрасы туралы құнды еңбектер көпшілік назарына ұсынылды.