Абай облысының әкімі Берік Уәли өңірдің дамуына серпін беретін жаңа бастамаларды жария етті. Оның айтуынша, алдағы уақытта облысқа ауқымды көлемде инвестиция тартылып, бұл бұрын-соңды болмаған көрсеткіштерге жеткізеді.

Аймақ басшысының айтуынша, инвестиция тарту – тек облыс басшылығының емес, әрбір деңгейдегі әкімнің тікелей міндеті. Осыған байланысты өңірде инвесторларға қолайлы жағдай жасау мақсатында бірқатар нақты шаралар қолға алынуда.

Соның бірі – Семей қаласында «Инвесторлар үйінің» ашылуы. Бұл орталық өңірге қызығушылық танытқан инвесторларды қабылдап, оларға қажетті ақпарат беріп, рұқсат құжаттарын алуға көмектесетін және жобаларды сүйемелдейтін бір терезе қағидаты бойынша жұмыс істейтін болады.

Аталған бастама өңір экономикасын жандандырып қана қоймай, жаңа жұмыс орындарын ашуға, инфрақұрылымды дамытуға және кәсіпкерлікті ілгерілетуге зор ықпал етпек.