Семей қаласы әкімінің міндетін атқарушы Бекжан Бапышев Нахаловка және Западный кенттерінің тұрғындарымен кездесті. Ашық диалог форматында өткен кездесуде тұрғындар күнделікті тұрмыс-тіршілігіне тікелей әсер ететін өзекті мәселелерді көтеріп, ұсыныс-пікірлерін жеткізді.

Тұрғындар тарапынан көтерілген мәселелердің қатарында орталықтандырылған ауызсу жүйесіне қосылу, жарық, жолдардың жай-күйі, қоғамдық көлік қатынасы, жарықтандыру мен санитарлық тазалыққа қатысты мәселелер айтылды.

«Тұрғындар көтерген әр мәселе – назардан тыс қалмауы тиіс. Қаладағы тиісті бөлімдер мен коммуналдық қызмет басшылары айтылған әрбір ұсынысты жеке бақылауына алып, нақты шешім қабылдауы керек», - деді Бекжан Бапышев.

Кездесу қорытындысында тұрғындар көтерген мәселелер егжей-тегжейлі зерделеніп, жауапты бөлімдерге нақты тапсырмалар жүктелді. Атап айтқанда, кент ішіндегі жолдарды тегістеу және қиыршық тас төсеу жұмыстары қолға алынатын болды.