Бүгін облыс әкімі Берік Уәли Семейдегі бірқатар нысандарды аралады. Аймақ басшысы «Семей-Павлодар» автожолының бойында орналасқан бақылау алаңына барып, жағдайымен танысты.

Бұл алаң семейліктер мен қала қонақтарының жиі аялдайтын орнына айналған. Облыс әкімі жақында қала экологиясы мен тазалығына үлес қосып жүрген экобелсенділермен кездесіп, олардың ұсыныстарын тыңдаған болатын. Кездесу барысында бақылау алаңында дәретхана мен қоқыс жәшіктерінің аздығы атап өтілген. Аймақ басшысы бұл мәселені назарға алып, тиісті жұмыстар жүргізілетінін айтқан болатын.

Қазіргі таңда бақылау алаңын абаттандыру жұмыстары жоспарланып отыр. Жоспарға сәйкес алаңда санитарлық-гигиеналық тораптар, қоқыс жәшіктері, демалыс орындықтары және жарықтандыру жүйесі орнатылады. Бұл жұмыстар қоғамдық кеңістіктерді жақсарту және тұрғындардың жайлы демалысын қамтамасыз етуге бағытталған.

Облыс әкімі бақылау алаңын абаттандырудың маңызын айтып, Семей қаласы әкімінің міндетін атқарушы Бекжан Бапышевқа аумақты кеңейту бойынша жоба әзірлеуді тапсырды.