Ұстаздар күні мерекесі қарсаңында шығармашыл, өнерлі мұғалімдерді жариялаймыз. Солардың бірі – Семей қаласындағы №51 «Келешек мектептің» директоры, физика пәні мұғалімі Қайырбек Абылқасымов. Ол мұғалімдік қызметпен қатар шығармашылықпен де айналысып жүр.

Педагогтің еңбек өтілі – 30 жыл. Екі жылдан бері өлең жазумен шұғылданып келеді. Қазірдің өзінде 1000-нан аса өлеңі бар. Әні мен сөзін өзі жазған шығармалары жүзден асты. Енді жеке кітабын шығаруды жоспарлап отыр. Оның туындылары махаббат, табиғат, қоғам және адамның күнделікті өмірі тақырыптарына арналады.

Сондай-ақ ол мектеп гимнін жазды. Қазір әнге аранжировка жасалып жатыр. Жақын уақытта оны мектеп оқушылары орындайды.

Мектеп директоры барлық музыкалық аспапта да ойнай алады. Мектепке өзінің тәрбиеге қатысты «3Б: ұят, обал, сауап» авторлық бағдарламасын, «1000 кітап» жобасын енгізіп, рухани-мәдени бастаманы қолға алған.

Оның «Ол - сезім» деп аталатын туындысы Нұрболат Абдуллиннің орындауында тыңдармандардың ықыласына бөленген. Жұмыс пен шығармашылықты қатар алып жүрген педагог жастарды үнемі жаңашыл болуға үйретеді.