Бүгін Семей қаласының солтүстік-шығыс бөлігінде орналасқан жаңа «Semey Smart City» ықшам ауданында 5000 адамға арналған мешіттің құрылысы бастау алды. Ғибадат орны қоғамдық қордың қаражаты есебінен салынады. Құрылысы 2028 жылы аяқталады деп жоспарланып отыр.

Мешіт «Semey Smart City» ықшам ауданындағы ең ірі әрі сәулеттік келбеті ерекше нысандардың бірі болмақ. Мұнда бір мезетте 5000 адам құлшылық ете алады. Үлкен қатымхана да қарастырылған. 

Аймақ басшысы құрылыс басында мешіттің облыс аумағындағы ең ірі ғибадат орны болатынын атап өтті. 

Жаңа ауданда 75 мың тұрғынға арналған заманауи тұрғын үй кешендері, 40-тан астам әкімшілік, коммерциялық және әлеуметтік нысандар, саябақтар мен демалыс аймақтары салынады.

Мемлекет басшысы Қасым-Жомарт Тоқаевтың қолдауымен басталған «Абайға құрмет» акциясы аясында еліміздің бірнеше өңірі Семей қаласында бір нысан салып беруге өз ұсыныстарын берді. Атап айтқанда, Маңғыстау облысы Достық үйін, Шымкент қаласы шығармашылық орталығын, Түркістан облысы көрме орталығын, Астана қаласы «Келешек» мектебін, Ақтөбе облысы жекпе-жек орталығын, Павлодар облысы үстел теннисі орталығын, Солтүстік Қазақстан облысы рәміздер алаңын, Қызылорда облысы «Анаға тағзым» орталығын, Батыс Қазақстан облысы желілік саябақты, Атырау облысы «Абай әлемі» орталығын, Шығыс Қазақстан облысы Ертіс жағажайын абаттандыруды жоспарлап отыр. Сондай-ақ облыс әкімдігі мен «Самұрық қазына» әл ауқат қорының бірлесуімен жақында қалада дене шынықтыру сауықтыру кешенінің құрылысы басталды.