2025 жылғы 31 қазанда Семей қаласында жоспарлы антитеррористік оқу-жаттығу өткізілуде.

Оқу-жаттығу жоспарына сәйкес шартты түрде «қызыл» деңгейдегі террористік қауіп енгізілді. Оның мақсаты – мемлекеттік органдар мен жедел әрекет ету қызметтерінің өзара іс-қимылын, сондай-ақ осал нысандарда түрлі қауіп-қатер жағдайлары туындаған кезде әрекет ету тәртібін пысықтау болып табылады.

Іс-шара барысында құқық қорғау органдарына қару-жарақ, жарылғыш заттар мен өзге де қауіпті заттарды анықтау мақсатында көлік құралдарының қозғалысын бақылауға және оларды тексеруге рұқсат етіледі.

Қала тұрғындары мен қонақтарынан тыныштық сақтап, қауіпсіздік шараларын орындауды және оқу-жаттығуға тартылған қызметкерлердің заңды талаптарын орындауды сұраймыз.

Абай облыстық терроризмге қарсы жедел штабы