1 маусым – Халықаралық балаларды қорғау күніне орай Жаңасемей ауданында мерекелік көңіл-күй ерекше болды. Бұл күні ауданның барлық аумағында балаларға арналған түрлі іс-шаралар ұйымдастырылып, бүлдіршіндер мен жасөспірімдерге қуаныш сыйланды.

Мерекелік бағдарлама аясында концерттер, ойын-сауық сайыстары мен шығармашылық көріністер өтті. Мектептер мен балабақшалардың тәрбиеленушілері ән шырқап, би билеп, өз өнерлерін ортаға салды. Кішкентай өнерпаздардың жарқын күлкісі мен шаттыққа толы көңілдері мерекенің сәнін кіргізді.

Іс-шараға аудандық клуб пен кітапхана қызметкерлері де атсалысып, балаларға арналған танымдық ойындар мен әдеби бұрыштар ұйымдастырды.

Ата-аналар мен аудан тұрғындары бүлдіршіндердің қуанышын бөлісіп, ұйымдастырушыларға ризашылықтарын білдірді. Осылайша, Балалар күні Жаңасемей ауданындағы әр отбасыға шаттық пен жылылық сыйлаған жарқын мерекеге айналды.