Прокуратура қызметі заңдылықты қамтамасыз етуге, азаматтардың құқықтары мен бостандықтарын қорғауға, сондай-ақ қылмыспен күресуге бағытталған құқық қорғау жүйесінің маңызды құрамдас бөлігі болып табылады. Бүгін Абай облысының өңірлік коммуникациялар қызметі алаңында Абай облысының прокуроры Ерлан Масғұтұлы Абаевтың қатысуымен баспасөз конференциясы өтті. Брифингте Абай облысы прокуратурасының 2023 жылдың бірінші жартыжылдығының қорытындысы жасалынды. 

Ағымдағы жылы облыс прокуратурасы органдарының жұмысы Мемлекет басшысының, Бас прокурордың тапсырмаларын орындауға, өңірдегі тұрақты қоғамдық-саяси жағдайды қамтамасыз етуге және құқық бұзушылықтардың алдын алуға бағытталды. Әлеуметтік сипаттағы мәселелерге назар аударылды. Әлеуметтік-экономикалық салада 14 мың азаматтың құқығы қорғалды.

Жеке кәсіпкерлерге қатысты 283 заңсыз салық бұйрығының күші жойылды. Облыс прокуратурасының базасында кәсіпкерлердің құқықтарын қорғау бойынша мобильді топтар құрылды.

Брифинг барысында  бюджет қаражатын жұмсау мәселелеріне де ерекше назар аударылды. 12,7 млрд теңгеге 55 конкурс тоқтатылды, 4,9 млрд теңгеге тағы 259 Мемлекеттік сатып алу шарттарын бұзу бойынша жұмыстар жүргізілуде. Мысалы, Жарма ауданындағы жолдарды жөндеуге арналған конкурс тоқтатылды. Онда «ҚазАвтоЖол» ҰК» АҚ Жөндеу жұмыстарын жоспарлаған жол учаскесіне 294 млн. теңге жұмсамақ болған. 

Жыл басында Мемлекет басшысы құқық қорғау органдарының назарын синтетикалық есірткінің таралуына қарсы күреске аударды.

Сондай-ақ, брифинг барысында «Семей орманы» МОТР аумағында орман өрттерінен кейін жүргізілген тексеру жұмыстарының барысы айтылды.  Абай облысы прокурорының орынбасары Руслан Әлішевтың айтуынша, нақты жұмыстар ҚР Экология министрлігімен бірге жасалынып, жауапты тұлғалар жазаланды.