Сенатор Қайрат Тастеев еліміздің Премьер-Министрінің атына Қазақстан киноиндустриясын дамытудың маңыздылығы туралы депутаттық сауал жолдады. 

Депутат қоғамдағы мәдени және зияткерлік ортаны қалыптастыруда киноиндустрияның маңызды рөл атқаратыны туралы атап өтті. Фильмдер мен телехикаялар ойын-сауық көзі ғана емес, сонымен қатар құндылықтарды, идеялар мен білімді насихаттау құралы болып табылады.

Сенатор осыған байланысты отандық кино саласы мамандарының алдында тұрған мәселелерді жедел шешуге шақырды. Теледидар бюджетінің едәуір бөлігі шетелдік телехикаяларды сатып алуға және аударуға жұмсалады, бұл өз өнімімізді жасауға арналған ресурстың аздаған бөлігін ғана қалдырып келеді.

Сенатор Министрлер Кабинетінің басшысына осы мәселелерді шешу жолдарын ұсынып отыр. Шетелдік өнімдермен бәсекеге қабілетті жоғары сапалы ұлттық фильмдер жасау үшін қазақстандық кинематографистер мен продюсерлерге қаржылық қолдау және салықтық жеңілдіктер беру керек. Кино және теледидар саласында білім беру бағдарламалары болуы тиіс, сондай-ақ теледидардағы шетелдік үлес көлемін реттеудің халықаралық тәжірибесін зерделеу қажет екені даусыз.