Семей қаласындағы №19 мектептің еңбек пәні мұғалімі құрақ көрпе тігіп, рекордтар кітабына енген. Бақытжан Шапенова ұзындығы 500 метрлік құрақ көрпе тігіп, конкурсқа қатысты.  

7 қарашада  өткен «Асыл Мұра» облыстық І қолөнершілер сайыс-фестиваліне қатысып,  жүлделі 3-орын алды. Сайысқа «Ұлы Сезім» жұмысын ұсынды. Бұл жұмыста ертеден келе жатқан кестелеу техникасымен екі жастың бейнесін кестелеп, жан жағына құрақ техникасымен блоктар тігу арқылы  картинаның мағынасын терең жеткізуге тырысқан. Құдық құрағын қосу арқылы шынайы сезімнің құдықтай терең, таза екенін көрсеткісі келген өнер иесінің еңбегі бағаланды.

Жазда республика бойынша өткен Аламан құрақ жобасына қатысып,   еліміздің түкпір-түкпірінен жиналған 200 құрақшымен бақ сынасты. Мұғалімнің жұмысы Қазақстандық рекордтар кітабына енді.

Айта кетейік, Астана қаласында өткен көшпенділер фестивальдарына,  ЮНЕСКО бойынша өткен көрмелерге, қаламызда Невзоровтар музейі ұйымдастырған аймақтық қолөнершілер фестиваль көрмелеріне қатысып, мұражай  шығарған аймақтық шеберлер жөніндегі анықтамалық кітабына енгізілді.

Абай облысы білім басқармасының баспасөз қызметі