«Жастардың волонтерлік бастамаларын қолдау» әлеуметтік жобасы аясында Абай облысы волонтерлерінің бірыңғай электрондық базасын қалыптастыру жоспарлануда. Бұл туралы өңірлік коммуникациялар қызметі алаңында өткен брифингте «Шығыс Жастары» ҚҚ атқарушы директоры Алиби Абдураимов баяндады.

Аталған жобаның басты мақсаты қала жастарын 10 күнге ауыл шаруашылығына икемдеуге арналған тапсырмалар беру. Сондай-ақ, осы әлеуметтік тапсырыс аясында облысымызға қарасты барлық ауылдық елді-мекендердегі ауыл жастарына әртүрлі сала бойынша кеңестер беріп, бағыт көрсетпек. Олардың қатарында Отбасы банк, Атамекен кәсіпкерлер палатасы, Даму, Агрокредит корпорациясы, Мансап орталығы және тағы басқа мекемелердің өкілдері болады.

Қоғамдық қор қала басшылығының қолдауымен «Бизнес инкубатор» жобасын іске асырады. Бизнес инкубатор құрудың негізгі мақсаттары жаңа кәсіпорындарды қолдау, инновацияларды өркендету, жаңа жұмыс орындарын құру, экономикалық өсімге үлес қосу, кәсіпкерлік мәдениетін қалыптастыру, әріптестік және желіні құру, аймақтық дамуды қолдау болып табылады. Қазіргі таңда бизнес инкубатордың орны анықталып, іске асыруға толықтай дайын.