28 тамыз күні аудан әкімі Әділет Қожанбаев ауданның көкпар құрамасының белді ойыншыларымен кездесу өткізді. Ұлттық спорт ойындары орталығында өткен кездесуде аудандағы ұлттық спорт ойындарының болашағы, оның ішінде нақты көкпар ойынын дамыту бағытындағы жоспарлар талқыланды.

Кездесуге аудандық мәдениет, тілдерді дамыту, дене шынықтыру және спорт бөлімінің басшысы Әлібек Саржанов, Ұлттық спорт ойындары орталығының ұжымы және ауданның белді көкпаршы азаматтары қатысты. Аудан басшысы Әділет Нұрсағатұлы ұлттық спорт ойындарын кеңінен насихаттап, дамуты бағытындағы ұстанымдарымен бөлісті. Сондай-ақ кездесуде командалық көкпар ойынын жүйелі дамыту, көкпар аттарын сатып алу, белді ойыншыларды қаржыландыру мәселелері қызу талқыланды. Көптен бері көкпарда аудан намысын қорғап, ұлттық спортты серік етіп жүрген ардагер көкпаршы Мұратқазы Ақанұлы, аудан құрамасының белді ойыншылары Арман Ізғұтты, Данияр Болатов, Дидар Сләмовтар ойларын ортаға салды.

Ашық пікіралмасу форматында өткен кездесуді қорытындылай келе, аудан әкімі Әділет Нұрсағатұлы басты мақсат аудан азаматтарының басын біріктіріп, ортақ мүдде жолында тізе қосып еңбек ету екенін атап өтті.