Абай облысының әкімі Нұрлан Ұранхаев «Энергетик» шағын ауданы тұрғындарымен кездесті. Кездесу барысында аудан тұрғындарының өтініштеріне құлақ түріп, қойылған сұрақтарға жауап берді.

«Энергетик» - облыс орталығындағы жаңа аудандардың бірі. Соңғы жылдары ауданда көпқабатты тұрғын үйлердің қатары көбейіп, халық саны да артып келеді. Шағын аудандағы жол асфальтталып, жылу жүйесі қалыпты беріліп тұр. Десе де, тұрғындарды мазалаған мәселелер бар.

Аудан тұрғындарының әкімге жеткізген өтініштерінің қатарында абаттандыру, ыстық су, балалар алаңын ретке келтіру сынды мәселелер бар. Сондай-ақ суық судың ара-тұра ажыратылатыны да айтылды.

Облыс әкімі тұрғындармен кездесіп қана қоймай, шағын ауданды аралап, жағдайды өз көзімен көрді. Сапар соңында орынбасары Димитрий Гариков пен өзге де жауапты тұлғаларға шағын ауданнның мәселесін шешуге қатысты нақты тапсырмалар жүктеді.