Келесі жылы Семейде автобустардың қызметіне өзгерістер енеді

17-12-2024, 13:10 Сәтжан Қасымжанұлы

Семейде бірнеше жылдан бері қаладағы қоғамдық көлік қатынасы өте өзекті мәселеге айналып отырғаны рас. Оның түрлі себептері бар: автобус жүргізушілерінің жетіспейтіндігі, соның салдарынан қоғамдық көліктердің қала ішіндегі желілерде қатынауы шекті мөлшерден аспайтындығы, тағы да басқа ертеден тамыр жайып кеткен проблемалар аз емес.

Дегенмен, Семей қаласына облыс орталығы мәртебесі қайта оралған күннен бастап, жергілікті атқарушы билік бұл түйткілді жөнге келтіруге барын сала бастағаны байқалады.

Семей қаласының әкімі Нұрбол Нұрсағатов атап өткендей, мәселені шешу мақсатында, 18 жаңа автобус сатып алынды. Олар жақын арада желіге шығады.

– Өткен жылы тасымалдаушылар 70 автобус сатып алды, ал биыл автопарктер 90 автобусқа жаңарды. Қазіргі уақытта 18 жаңа автобус әзір тұр, оның 10-ы үлкен, 8-і кіші классты. Жалпы, біз 160 автобус ауыстырдық, бұл – көлік паркінің шамамен 50%-ын құрайды. Жаңа шағынаудандар, мысалы, Комсомол кенті, Қарағайлы да қоғамдық көлікпен қамтылып отыр, өткен жылы №45-ші маршрутты іске қостық, биыл №10-шы маршрутты іске қосып жатырмыз. Сонымен қатар, қоғамдық көлікті дамыту бойынша жаңа кешенді жоспар дайындалады, осы жоспар аяқталғаннан кейін жаңа маршруттар әзірленеді. Биыл, тасымалдаушыларымыз субсидия алғандықтан, көлік паркін жаңарту жұмыстарын жүргізуде. Екі жыл бұрын автобус техникасының шығуы 50% болатын, қазіргі таңда бұл көрсеткіш 75%-дан төмен емес, - дейді қала әкімі.

Ал «Авто Транс Семей» ЖШС құрылтайшысы Григорий Пинчуктың айтуынша, автобустардың үлкен классты модельдері осы компанияның еншісіндегі №33 және №31 бағыттарында, ал кіші классты автобустар 17 және 44 бағыттарда қызмет көрсетуін жалғастырмақ.

– Жалпы, біздің паркте әртүрлі класты 300-ге жуық автобус бар, шамамен 300 жүргізуші жұмыс істейді. Дегенмен, D санаты бойынша жүргізушілердің тапшылығы 50-100 адам шамасында. Егер жұмысшылар саны жеткілікті болса, жұмыс екі ауысыммен жүрер еді. Сонымен қатар, келесі жылы орта классты 40-50 автобус сатып алуды жоспарлап отырмыз, өйткені қазіргі уақытта қолданыстағы автобустардың ресурсы таусылған, - дейді Г. Пинчук.

Бұған қоса тағы бір айтар жайт, алдағы жылдан бастап жолаушы санына есептелетін тариф негізіндегі субсидиялау моделі өзгермек. Енді, оның орнына маршруттың есептік құнына негізделген нұсқа енгізілмек. Яғни, тасымалдаушы күніне жүрген қашықтығына қарай қаржы алады. Мұндай өзгеріс автобус жүргізушілерін желідегі жұмыс уақытын ұзартуға ынтасын арттырады. Бұл туралы өңірлік коммуникациялар қызметінде өткен брифингте Семей қаласы әкімінің орынбасары Әділет Тұрысбек мәлімдеді.

- Салыстырмалы түрде айтсақ, Абай облысы құрылғанға дейін техниканың маршруттарға шығу пайызы 50%-дан аспайтын. Бұл мәселе халықты тасымалдау сапасына айтарлықтай әсер етті. Деседе облыс құрылғаннан кейін біз, бұл мәселенің шешімін неғұрлым жедел шешуге тырыстық. Қазіргі уақытта автобустардың желіге шығу пайызы 75%-дан төмен емес және тұрақты деңгейде сақталуда, – дейді Әділет Тұрысбек.

Сонымен қатар, қала әкімінің орынбасарының айтуынша, алдағы субсидиялау өзгерісі автопарктердің қозғалыс құрамын жаңартуға жол ашады

– Қаланың барлық маршруттарында электронды билет жүйесі іске қосылған. Біріккен диспетчерлік және бақылау қызметі бойынша айтсақ, қала әкімдігінің Жолаушылар көлігі және автомобиль жолдары бөлімі және Жолаушылар тасымалы басқармасы орталығы келісімшарт жасасқан. Барлық ақпарат сол жерден тапсырыс берушіге беріліп, осы мәліметтер негізінде қаражат мәселесі реттеледі, – дейді Ә. Тұрысбек Абай өңірлік коммуникациялар қызметінде БАҚ өкілдеріне берген сұхбатында.

Жолаушылар көлігі және автомобиль жолдары бөлімінің сектор меңгерушісі Арман Жоламанов автобус қозғалысының аралықтары мен тұрақтылығының бұзылуына қатысты тұрғындар шағымынан хабардар екенін жасырған жоқ.

Оның айтуынша, қозғалыс тұрақтылығының жүйесі бұзылған жағдайда, субсидиялау ережелеріне сәйкес, теңдей бөлінетін субсидия сомасын төмендетіледі.

«Мұндай жағдайларды біз назардан тыс қалдырмаймыз. Қазіргі таңда, жолаушылар тасымалын басқару орталығы бізге әр маршрут бойынша жоспардың қанша пайызға орындалғаны туралы мәлімет беріп отырады»,- деп толықтырды А. Жоламанов.

Семей қаласының Жолаушылар көлігі және автомобиль жолдары бөлімінің басшысы міндетін атқарушы Әділбек Увасилов маршруттық желілерді оңтайландыру және жаңа желілерді әзірленбек. Бұл туралы толығырақ түсіндірді. Ә. Увасиловтың мәлімдеуінше, 2025 жылы қалада маршруттық желілерді оңтайландыру қолға алынады. Оған қатысты барлық мәселелер зерттеліп, ғылыми тұрғыда талдаудан өткізіледі.

Жалпы, қазіргі күнде Семей қаласында 6 жолаушы тасымалымен айналысатын компания қызмет көрсетеді. Қала билігінің тұрғындар тарапынан жиі айтылатын автобустардың ерте тоқтап қалатыны, сенбі, жексенбі де тіптен сиреп кететініне қатысты шағымдарды қаншалықты шеше алғанын алдағы жылы айқындап береді.

Тағыда оқыңыз

Мемлекет басшысы Қасым-Жомарт Тоқаевтың «Әділетті Қазақстанның экономикалық бағдары» атты Қазақстан халқына Жолдауы Қасым-Жомарт Тоқаев: Біз озық ойлы ұлт ретінде тек қана алға қарауымыз керек Мемлекет басшысы Қасым-Жомарт Тоқаевтың Ұлттық құрылтайдың «Адал адам – Адал еңбек – Адал табыс» атты үшінші отырысында сөйлеген сөзі Мемлекет басшысы Қасым-Жомарт Тоқаевтың «Әділетті Қазақстан: заң мен тәртіп, экономикалық өсім, қоғамдық оптимизм» атты Қазақстан халқына Жолдауы Семей қаласының автопарктері жаңа автобустармен толықты

Бізге ақпарат жолдаңыз Телеграмдағы каналымыз

Келесі жылы Семейде автобустардың қызметіне өзгерістер енеді

Пікірлер (0)