Қала әкімі Талғат Мұратов бөлім басшыларымен бірге өткізген көшпелі жұмыс кеңесі барысында Семей қаласындағы бірқатар саябақтар мен алаңдарды аралап, олардың жағдайын тексерді. Қала басшысы атап өткендей қаладағы қоғамдық орындар тұрғындар үшін қолайлы болуы шарт. 

Әкім атап айтқанда, Жамақаев көшесінің бойында орналасқан саябақ, Мұхтар Әуезов алаңы және «Абай жолы» аллеясын аралап көрді. Бұл саябақтар мен алаңдар қала тұрғындарының күнделікті өмірінде маңызды орын алады, өйткені бұл нысандар демалыс орындары ретінде танымал. Ал Қабанбай көшесі мен Шәкәрім даңғылының қиылысында орналасқан Шәкәрім Құдайбердіұлының ескерткішіне мердігер өз қаражаты есебінен ескерткіштің айналасына жарықтандыру жұмыстарын жүргізген. 

Жұмыс кеңесінде қала әкімінің тарапынан нысандарды абаттандыру және күтіп ұстау мәселелері талқыланды. Себебі бүгінде Жамақаев көшесіндегі саябақта орналасқан аркаларды бүлдіріп, вандализм жайттары байқалды. Осыған орай әкім тұрғындарды қаламызды күтіп ұстауға, оны таза әрі көрікті етіп сақтауға шақырды. Сонымен қатар, қала тазалығы мен көркейту жұмыстарының тек коммуналдық қызметтердің ғана емес, әрбір азаматтың ортақ міндеті екенін жеткізді.