Абай театрында Қазақстан Республикасының еңбек сіңірген мәдениет қайраткері, Татарстан Республикасының еңбек сіңірген өнер қайраткері, талантты композитор, музыкант Олег Джанияровтың 80 жылдығына арналған еске алу концерті өтті.

Музыка әлемінде өшпес із қалдырған бірегей тұлғаның шығармашылығы Қазақстан мен Татарстан мәдениетінің алтын қорына енген. Оның шығармалары тыңдарман жүрегінен ерекше орын алып, рухани байлық сыйлады.

Кеш барысында Олег Джанияровтың фортепиано мен оркестрге арналған «Симфониетта для камерного оркестра», «Домбыраға арналған концерт», «Старинный напев», «Күт мені күт, Сәулем» және басқа да туындылары орындалды. 

Концертке Абай облысы әкімінің эстрадалық-симфониялық оркестрі, Мұқан Төлебаев атындағы музыка училищесінің ұжымы, сондай-ақ белгілі солистер мен музыканттар және «Ерен еңбегі үшін» медалінің иегері, танымал дирижер - Кенжегүл Ақшекина қатысты.

Сондай-ақ, осы айтулы кешке композитордың отбасы мүшелері – қарындасы Айгүл Джаниярова, ұлы Ринат Джанияров және басқа да жақындары концерттің қадірлі қонағы болды.

Бұл кеш – ұлы музыканттың шығармашылығына деген құрмет пен оның өнерін келер ұрпаққа насихаттаудың жарқын үлгісі. Көрермендер ұлы композитордың ерекше әуендеріне тағы да бір рет құлақ түріп, оның мәңгілік мұрасын сезінуге мүмкіндік алды.