«Ит - адамның досы» дегенді жақсы түсінетін Бесқарағай ауданының әкімі Нұрбек Қошқарбаев қаңғыбас иттерді баспанамен «қамтамасыз етуге» баса назар аударып отыр. Бұл туралы ол өзінің Instagram парақшасында жариялады.

Аудан әкімінің айтуынша, осы мәселеге қатысты Канонерка ауылы тұрғындарының ұсынысы ескерілген. Әкім сонымен бірге жұртшылықты жануарларға жауапкершілікпен қарауға шақырып отыр. 

Әрине, «әкім бол, халқыңа жақын бол» деген нақылды басқа басшыны қайдам, Қошқарбаевтың жете түсінген осы бастамасына қуана қол соғуға болады. Алайда, осы ауданның әкімі қызметіне өткен жылдың соңында келген, яғни, «таққа отырғанына» екі ай енді болған жаңа әкім бұл мақсатқа қанша қаражат жұмсалатынын айтудан айналып өтіпті. Есесіне аудан әкімдерінің арасында «иттер интернатын» ашқан алғашқы әкім болып аты тарихта қалатын сыңайлы.

Айтпақшы, Бесқарағай ауданының жаңа әкімі тағайындалғанына көп уақыт өтпей жатып «Болашағын ойлайтын ел ең әуелгі игілікті болашағына, балаларға жасайды» деп ешбір басшының басына келмеген ой айтып таңғалдырған болатын. Бірақ, болашаққа қатысты игілікті балалардан бұрын қаңғыбас иттер көретін түрі бар.