«Семей қаласының орталықтандырылған кітапхана жүйесі» КММ-нің №12 кітапхана-бөлімшесінің қызметкерлері халық ақыны, фольклоршы, сазгер Шәкір Әбеновтың «Шыңғыстау» кітабы бойынша «Шыңғыстаудың бір шыңы» атты әдеби ақпарат өткізді.

Іс-шараға Шәкәрім университетінің қазақ филологиясы факультетінің деканы, профессор Айбар Қабыкенұлы Қадыров, Шәкір Әбеновтың немере қызы халық әншісі Майра Аманғалиқызы Мусатаева және №30 мектептің 9 сынып оқушылары қатысты.

Шара барысында кітапхана қызметкері Абай мектебінің ақыны әрі жыршысы, қазақтың дәстүрлі мәдениеті, музыкасы мен поэзиясы туралы нағыз энциклопедиялық білім иесі Шәкір Әбенов туралы ақпарат беріп, сондай-ақ  Ш.Әбенов Ж.Жабаев, Д.Нұрпейісова, Нартай, Шашубай, Нұрхан, Төлеудің импровизациялық өнерін жалғастыра отырып, олардың халық ауыз әдебиеті туралы білімдеріне сүйеніп өзіндік дара стилін тапқанын, әлем әдебиетінің классиктері Байрон, Гете, Пушкин, Лермонтов, Шевченко, Фет, Блок, Есениннің шығармаларын оқығанын айтты.

Іс-шара қонағы Айбар Қабыкенұлы «Абай дәстүрі - Шәкір Әбенов» атты шығырмасымен оқырмандарды  таныстырып, Абай поэзия мектебі, Шәкір Әбеновтің шығармашылығы туралы айтып, ол Абай дәстүрлерінің ізбасары болып саналатынын, сондай-ақ ақынның шығармаларында көрініс тапқан моральдық идеялар туралы айтты. Шәкір Әбеновтің немересі Майра Аманғалиқызы ақынның «Алтай Аруы» және «Айна» әндерін орындады.

Әдеби ақпарат «Шыңғыстаудың бір шыңы» атты бейнеслайдпен жалғасып, оқушылар Шәкір Әбеновтың «Балаларға», «Достық туралы», «Білімді білгішпін деп мақтанбайды», «Өмірге ғылым-сәуле, өнер-өрнек» атты терме-толғау өлеңдерін оқыды.

Шара соңында Шәкір Әбеновтің шығармалары қазақ әдебиетінің қазанасына қосылған асыл мұра екені, ақынның шығармашылығы қазақ әдебиеті тарихында лайықты орын алғаны айтылып аяқталды.