Облыс әкімі Берік Уәли Үржар ауданына жұмыс сапарымен келді. Аймақ басшысы сапар барысында әлеуметтік маңызы бар бірқатар нысандарды аралады.

Әкім сапары Лайбұлақ ауылындағы дәрігерлік амбулаторияның жұмысымен танысудан басталды. Нысан «Ауылда денсаулық сақтауды жаңғырту» ұлттық жобасы аясында салынған. Амбулатория заманауи медициналық құрал-жабдықтармен толық жабдықталған, электр желісі тартылған. Қазіргі уақытта орталық су жүйесіне қосу үшін сорғы құрылғыларын жөндеу жұмыстары жүргізілуде. Су маусым айының соңына дейін қосылады деп жоспарланған.

Бүгінде ауыл тұрғындарына 1962 жылы салынған ескі медициналық пункт қызмет көрсетіп отыр. Ауылда 362 адам тіркелген. Енді осы мекемеде жұмыс істейтін 4 медицина қызметкері жаңа ғимаратқа көшеді.

Облыс әкімі медициналық нысанның ауыл тұрғындары үшін маңызын атап өтіп, тез арада іске қосуды тапсырды. 

Облыс әкімі Жоғарғы Егінсу ауылындағы құрылысы кешеуілдеп келе жатқан 100 орындық Мәдениет үйін де көрді. Нысан «Ауыл – ел бесігі» бағдарламасы аясында салынып жатыр. Ғимарат іске қосылғанда мұнда кітапхана мен әкімдік орналасатын болады. Құрылыс жұмыстарының 60 пайыздан астамы аяқталған. Қазір ғимарат ішінде әрлеу және монтаждау жұмыстары жүргізілуде. Нысанды толық аяқтау үшін қосымша қаржы бөлу қажеттігі туындап отыр.

Аймақ басшысы осы жерде ауыл ақсақалдарымен кездесіп, пікірлесті.

Елді мекен тұрғындары ауылда жасалып жатқан жұмыстарға ризашылықтарын жеткізді.

«Біздің ауылда жаңа ғимараттың салынбағанына 60 жылдан асып кетті. Бұл - үлкен жаңалық. Бірден екі нысан бой көтеріп жатыр. Ауыл тұрғындарының атынан алғыс айтамыз», - деді ауыл тұрғыны Саметхан Интышев.