Облыс әкімі Берік Уәли Қытайдың Шыңжаң ұйғыр автономиялы өлкесі Тачен (Тарбағатай) аймағының партия комитетінің хатшысы Чжи Сяньвэймен бейнебайланыс арқылы кездесу өткізді. Кездесу барысында Абай облысы мен Шәуешек қаласы арасындағы арасындағы екі жақты ынтымақтастықты дамыту мәселелері талқыланды.

Тачен (Тарбағатай) аймағының партия комитетінің хатшысы Чжи Сяньвэй «Аягөз-Тачен» темір жол желісінің құрылысына, Бақты кеден бекетінің көліктерді өткізу көлемін ұлғайтуға, туристер үшін «жасыл дәліз» ашуға, сауда-саттықты жандандыру үшін шекара маңындағы аймақта жәрмеңке өткізуге байланысты ұсыныстарын айтты. Туризм бағытында бірлесе жұмыс істеуге дайын екенін білдірді.

Аймақ басшысы Берік Уәли екі өңірдің ынтымақтастық әлеуетінің зор екеніне тоқталып, биылғы 5 айда Абай облысы мен Қытай өңірлері арасындағы тауар айналымы 812 млн АҚШ долларын құрағанын атап өтті. Бақты шекарасында жәрмеңке өткізу ұсынысын қолдап, бірлескен сауда платформасын құруға дайын екенін жеткізді.