Бүгін облыс әкімі Берік Уәли таңғы сағат 7-ден бастап Семейдегі жол жөндеу, аулаларды абаттандыру жұмыстарымен танысты.

Биыл «Аулаішілік аумақтарды ағымдағы жөндеу» бағдарламасы аясында облыс орталығындағы 22 ауланы абаттандыру жоспарланған. Олардың тең жартысы сол жағалауда, қалғаны оң жағалауда орналасқан. Жоба аясында ашық спорт және балалар ойын алаңдарын, шағын сәулеттік формаларды орнату көзделген. Бұдан бөлек халық қатысатын бюджет аясында қосымша 13 аула абаттандырылады.

Қазіргі таңда қаладағы 14 үйдің ауласында абаттандыру жұмыстары басталды. Аймақ басшысы Шығыс кентіндегі Аюченко көшесі 3 мекенжайында жүргізіліп жатқан жаңарту жұмыстарын көріп, тұрғындармен пікірлесті.

Тұрғындар аулаларының жаңа кейіпке еніп жатқаны үшін алғыс айтып, ризашылықтарын жеткізді.

Сонымен қатар аймақ басшысы Қостанай көшесіндегі аулаішілік жолдарды көрді. Биыл Семей қаласындағы 40 ауланы асфальттау жоспарланған. Қазіргі кезде оң жағалауда 6 аулада жұмыс жүріп жатыр. Ал сол жағалаудағы 8 аулада жөндеу жұмыстары басталған.

Облыс әкімі мердігерлерге жұмысты уақтылы әрі сапалы аяқтауды тапсырды.