2025 жылғы 30 мамыр күні Жаңасемей ауданы әкімдігінде ағымдағы жылдың көктемгі маусымына арналған кезекті жұмыс отырысы өтті. Жиынға аудан әкімінің орынбасары төрағалық етті. Басқосуға бөлім және мекеме басшылары, ауылдық округ әкімдері, сондай-ақ коммуналдық қызмет пен әлеуметтік сала өкілдері қатысты.

Отырыстың күн тәртібінде ауданның әлеуметтік-экономикалық дамуының өзекті бағыттары, көктемгі егіс жұмыстарының барысы, тұрғын үй-коммуналдық шаруашылығындағы жағдай, санитарлық тазалық және абаттандыру шаралары қаралды. Сонымен қатар, аудан аумағындағы жол жөндеу, суару жүйелерін қалпына келтіру, жастар саясатын жүзеге асыру және қоғамдық тәртіпті сақтау мәселелері де талқыланды.

Аудан әкімінің орынбасары ауылдық округ әкімдерінен көктемгі тазалық айлығының қорытындысын және тұрғындармен атқарылып жатқан жұмыс барысын сұрап, ауылдардағы инфрақұрылымдық жобалардың уақтылы және сапалы орындалуының маңыздылығын атап өтті. Сонымен қатар, елді мекендерде бюджет қаражатының тиімді жұмсалуын қатаң бақылауда ұстау қажет екенін ескертті.

Отырыс барысында білім, мәдениет, денсаулық сақтау және әлеуметтік қамту салаларының басшылары да өз бағыттары бойынша есеп беріп, алдағы кезеңге арналған жоспарларымен бөлісті. Әсіресе, мектептердің жазғы лагерьлерге дайындық деңгейі мен балалардың қауіпсіз демалысын қамтамасыз ету мәселесіне ерекше назар аударылды.

Жиын соңында аудан әкімнің орынбасары жауапты тұлғаларға нақты тапсырмалар беріп, әрбір бағыт бойынша орындалу мерзімдерін белгіледі. Әкім аппарат жетекшісіне тұрғындармен кері байланыс жүйесін жетілдіруді, халықтың ұсыныстары мен шағымдарын жедел қарауды тапсырды.