Берік Уәли Оқушылар сарайына баратын жаяу жүргіншілер көпірінің құрылысын қадағалады
Аймақ басшысы Берік Уәли Семейдегі Бозтаев көшесі мен Оқушылар сарайын байланыстыратын жаңа жаяу жүргіншілер көпірінің құрылыс барысын көрді.
Жоба Оқушылар сарайына келетін балалар мен тұрғындардың қауіпсіздігін қамтамасыз ету мақсатында жүзеге асырылуда. Осыған байланысты қаланың сол жағалауындағы айналма жолайрық аумағында жер үсті жаяу жүргіншілер өткелі салынып жатыр.
Өткелдің ұзындығы – 34 метр, биіктігі 6 метрге жуық. Құрылыс жұмыстары биыл қыркүйек айында басталған. Қазіргі уақытта нысандағы бетондау жұмыстары толық аяқталды. Жолдың екі жағында көпірдің металл конструкцияларын монтаждау жұмысы жүргізіліп жатыр.
Келесі кезеңде нысанда жарықтандыру жүйесі орнатылып, екі лифт жабдықтары монтаждалады. Мердігерлердің айтуынша, барлық құрылыс-монтаж жұмыстары желтоқсан айының ортасында аяқталады деп жоспарланып отыр. Құрылыс жұмыстары бекітілген кестеге сәйкес жүргізілуде. Жоба BI Group компаниясының демеушілігімен қалаға сый ретінде жүзеге асырылуда.
Облыс әкімі нысанды белгіленген мерзімде аяқтап, құрылыстың сапасына баса мән беру қажеттігін атап өтті.




