Қазақстан Республикасының Цифрлық даму және аэроғарыш өнеркәсібі министрі Бағдат Мусин Абай облысына жұмыс сапары аясында азаматтарға қоғамдық қабылдау өткізді.

Қабылдау барысында Аягөз ауданының тумасы Думан Кенжеғазыұлы өзінің туған ауылындағы интернет мәселесінің ұзақ жылдар бойы шешім таппай келе жатқанын айтты.

Оның айтуынша Аягөз ауданына қарасты Тарбағатай ауылында соңғы жылдары интернет мәселі жиі қозғала бастады. Алайда жауапты сала өкілдерінен ешқандай нәтижелі кері байланыс болмаған. Министр аталған мәселені өзінің тікелей бақылауына алатынын жеткізіп, оны қысқа мерзім ішінде шешуге уәдесін берді.

Сондай-ақ, Телекоммуникациялар комитеті төрағасының орынбасары Жақсылық Ибрагимов өтініш иесімен жеке әңгімелесу өткізіп, мәселенің шешілу жолын талқылады.

Жауапты сала өкілі Тарбағатай ауылындағы интернет мәселесінің нақты қашан шешілетінін айтты.