Республика мерекесіне орай, Жарма ауданында жаңадан салынған тұрғын үйлер пайдалануға берілді. 

Жарма ауданы, Қалбатау ауылындағы Искаков көшесінде жаңадан салынған 20 пәтердің кілттері халықтың әлеуметтік осал топтарындағы азаматтарға, ата-ана қамқорлығынсыз қалған балаларға және жалғыз баспанасы апатты деп танылған отбасыларына берілді.

Жаңа үйлерде тұрмысқа қажетті барлық жағдай жасалған. Құрылысты жүргізіп, қолданысқа берген мердігер ұйым - «Жарма Құрылыс-Газ» ЖШС.

Салтанатты шараға аудан әкімі Жарқынбек Байсабыров қатысып, жаңа пәтер иелерін қоныс тойларымен құттықтап, құрылыс қарқыны өсіп келе жатқаны туралы атап өтті. 

Пәтер иелері атынан ауыл тұрғыны Т. Аубакиров алғысын білдірсе, құрылыс мекемесінің басшысы Д. Исабаева да өз құттықтау лебізін жеткізді. Ауылдың қадірменді ақсақалы, еңбек ардагері З. Таңатаров ақ батасын беріп, мәдениет үйінің өнерпаздары әннен шашу шашып, жиналғандарға жақсы көңіл-күй сыйлады.