«Шығыс»  өңірлік қолбасшылығына қарасты 5518 әскери бөлімінде бір жыл ішінде Отан алдындағы борыштарын атқарған сарбаздарды құрметпен шығарып салу  рәсімі өтті. Мерейлі кеште жауынгерлік қызметте жоғары нәтижеге ие болғандар марапатталды. Әскери бөлім тарапынан алғысқа бөленген сарбаздың бірі украиндық Никита Дяченко. Әскер қатарына Алматы облысынан шақыртылған жауынгерсіз  әскери бөлімнің мәдени өмірін елестету қиын. Домбыраның құлағында ойнайтын өзге ұлт өкілі кез келген іс-шараның ажарын ашып, көркін кіргізетін.  Бала кезінен музыкалық мектептен сусындаған күйші жігітке әскери бөлім басшылығы  домбыра мен тақия тарту етті.  

Отан алдындағы борышын атқарған әскери бөлімнен мұндай тосын-сыйды күтпеген жауынгер алғашында абдырап қалды. Алайда, жиналған жұрттың қолқа салуымен, су жаңа аспаптан күй орындап, жайдары қалыпқа енді. Шара соңында қатардағы жауынгер естелікке мұндай  сыйлық ұсынған әскери бөлімге ризашылығын білдірді.

«Шығыс» өңірілік қолбасшылығының баспасөз қызметі