Аудан әкімі Әділет Нұрсағатұлының ауданның елді мекендермен танысу мақсатындағы жұмыс сапары Үлкенбөкен және Биғаш ауылдық округтерінде жалғасты. 

Бөлім басшылары және салалық қызмет өкілдермен бірге Жансары, Үлкенбөкен, Биғаш және Егінбұлақ ауылдарында болып, салынып жатқан құрылыстардың барысымен танысты, әлеуметтік нысандарды аралап, жергілікті тұрғындармен кездесу өткізді.

Жансары ауылында тұрғындар тарапынан бірқатар мәселелер айтылды. Ауылға кіре беріс 500 метр жолды грейдерлеу сұрағы бойынша  аудан басшысы ауылдық округ әкімі Қайрат Жылқышевқа тапсырма жүктеді. Сондай-ақ ауыл ішінде мал ұстау ережесін сақтау, медициналық қызметке қолжетімділік сынды бірқатар маңызды сұрақтар қойылды. Халық тарапынан түскен барлық сауалдарға жауап беріліп, шешу жолдары талқыланды.

Үлкенбөкен ауылында әлеуметтік баспана құрылысымен танысып, мектеп және жекеменшік балабақша ғимаратын аралап, бүгінгі тыныс-тіршілігімен танысты. Әділет Нұрсағатұлы округ әкіміне әлеуметтік баспана құрылысын қатаң бақылауда ұстауды тапсырды.

Мәдениет үйінде өткен кездесуде ауыл ақсақалдары халықты толғандырған бірқатар сұрақтарды ортаға салды. Олардың қатарында балалар алаңын салу, ауыл көшелерін жөндеу сынды мәселелер бар. Аудан басшысы Әділет Нұрсағатұлы барлық сұрақтар мен өтініштерді жеке өз бақылауына алғанын атап өтті.

Биғаш ауылдық округінде халықпен кездесу барысында аудан әкімі Әділет Нұрсағатұлы кейбір түйінді мәселелердің шешу жолдары мен орындалу барысын баяндап берді. Былтырғы жылы құрылысы басталған су құбыры желілерін аяқтау, Көкпекті-Биғаш автокөлік жолына жөндеу жұмыстарын жүргізу, интернетке қосылу мәселелері бойынша түсініктеме жасалды. Тұрғындар тарапынан түскен басқа да сұрақтар бойынша шешу жолдары қаралады.

Егінбұлақ ауылында жер телімін алу, жолды грейдерлеу, ауылдық клуб ғимаратын жөндеу сынды сұрақтар қойылып, жауап берілді.