12 шілде күні Семей қаласында Абай облысы ветеринария басқармасының ұйымдастыруымен ветеринариялық дәрігерлер арасында волейболдан жарыс өтті. Турнирге ауданның ветеринария дәрігерлерінен құралған “Көкпекті-Вет” құрамасы қатысып, жарыс жеңімпазы атанды.

Қазақстанда биылдан бастап 10 шілде ресми «Ветеринария қызметкерлері күні» болып бекітілді. Жаңа мереке үй жануарларының денсаулығы мен жануарлардан алынатын өнімдердің қауіпсіздігін қамтамасыз етуге үлес қосатын ветеринарлық мамандардың еңбегінің маңыздылығын атап өтуге арналған.

Жарысқа 9 ауданнан барлығы 13 команда қатысқан. Турнир үшінші жыл қатарынан ұйымдастырылды. Тартысты өткен ойындар нәтижесінде «Көкпекті-Вет» командасы 1 орын, «Аягөз-Вет» 2 орын және «Республикалық ветеринариялық зертхана» 3 орынға ие болды. Барлық жеңімпаздар кубок, медаль және грамотамен марапатталды.

Айта кетейін, Көкпекті ауданының құрамасы ветеринария саласының қызметкерлері арасындағы облыстық жарыста 3 жыл қатарынан жеңімпаз болып отыр.