Абай облысының әкімі Берік Уәли жаңадан салынып жатқан Оқушылар сарайының құрылысымен танысты. 

Семейде балалар мен жастардың жан-жақты дамуына үлес қосатын көпфункционалды орталықтың құрылысын BI GROUP компаниясы жүргізуде. Ғимараттың жалпы аумағы 2,1 га, ауданы 9 800 шаршы метр, бір мезгілде 500 адамды қабылдай алады.

Абай облысы құрылыс басқармасының басшысы Шыңғыс Риахановтың айтуынша, негізгі құрылыс жұмыстарының 80 пайыздан астамы аяқталған. Монолит жұмыстар, кірпіш қалау, металл конструкциялары толық орындалды, шатыр және қасбетті әрлеу жұмыстары да аяқталуға жақын. Қазіргі уақытта ішкі әрлеу, инженерлік жүйелерді орнату және аумақты абаттандыру жүргізілуде. Құрылыс алаңында 54 маман және 2 техника жұмыс істеп жатыр.

Жобаға сәйкес, Оқушылар сарайы алты негізгі бағытқа бөлінген: ғылыми-техникалық, көркем-эстетикалық, спорттық-сауықтыру, гуманитарлық, психологиялық, тарихи-өлкетану. Мұнда робототехника, бағдарламалау, шығармашылық студиялар, театр және музыка үйірмелері, спорттық секциялар, білім беру курстары, әдебиет пен тіл үйрену, тұлғалық даму, өңір тарихы мен мәдениетін зерттеу алаңдары жұмыс істейді. Әр бөлім өз тақырыбына сәйкес жабдықталады. Сондай-ақ, ғимаратта бассейн қарастырылған. Құрылыс жұмыстары жоспарға сай жүргізілуде, жақын арада әрлеу және абаттандыру жұмыстары аяқталмақ.

Өңір басшысы қала әкіміне оқушылар сарайына келетін желілік инфрақұрылым мен айналасын абаттандыру мәселесін шешу бойынша бірқатар міндеттер жүктеді.