Мерейлі жасқа толған ақынға құрмет көрсетілді

20-07-2023, 17:00 Еркежан Қуатқызы

Бүгін ақын, жазушы, ҚР «Ерең еңбегі үшін» медалінің, «Абай» медалінің иегері, Қазақстан Республикасы Мемлекеттік сыйлығының лауреаты Тыныштықбек Әбдікәрімұлының туған күні. Ақын мерейлі 70 жасқа толып отыр. Бүгін Абай облысының әкімі Нұрлан Ұранхаев ақын Тыныштықбек Әбдікәкімұлын 70 жас мерейтойымен құттықтады.

Тыныштықбек Әбдікәкімұлы - 1953 жылы 20 шілдеде Абай ауданында туған. Семей облыстық мәдениет басқармасының ғылыми-методикалық орталығында редактор, Абайдың республикалық тарихи-мәдени, әдеби мемориалдық қорық-музейінде ғылыми қызметкер, республикалық «Алаш үні» газетінде кеңесші және қызметін атқарған.

«Тыныштықбек Әбдікәкімұлы Сізді 70 жас мерейтойыңызбен шын жүректен құттықтаймын! Сіз мерейлі жасқа толып жатқанда өзіңізбен бетпе-бет кездесіп, көзбе-көз құттықтауды жөн санадық. Әдебиетті бағындыру үшін Алматы немесе Астанаға кетпей-ақ, туған жерде жүріп те қолтаңба қалдыруға болатынын дәлелдеген бірден бір ақын өзіңіз. Сіздің туған жерге деген адалдығыңыз – көпке үлгі-өнеге.Сонау 90-жылдардың басында әдебиет әлеміне атыңызды шығарған «Ақшам хаттары» жыр жинағыңыз бәріміздің есімізде. Одан кейін де көптеген өлеңдер жинағыңыз жарық көрді. Сізге қарап бой түзеп, сізге еліктеп өлең жазғысы келетін артыңызда бірнеше буын өсіп жетілді. Бұның бәрі сіздің қалам ұстаған ой еңбегіңіздің арқасы деп білеміз. Алдағы уақытта да әдеби мұраңыз көбейе беретініне сенеміз. Ең бастысы өзіңізге денсаулық, отбасыңызға амандық тілеймін», - деді Абай облысының әкімі Нұрлан Ұранхаев.

Жазушы шығармашылығының Абай өңірінің тұрғындары үшін алар орны ерекше екені сөзсіз. Оның шығармалары зерттеу жұмысының объектісі, ол өз еңбектерінде дүние жүзіндегі халықтарға ортақ ежелгі қағидалар мен киелі ұғымдарды қазақтың ұлттық дүниетанымы арқылы талдай білген.

«Тыныштықбек Әбдікәрімұлы бүкіл саналы ғұмырын қазақ әдебиетінің дамуына арнады. «Ақшам хаттары» атты пышақтың қылындай кітабы шығып, сол кітап арқылы қазақ әдебиетіне үлкен төңкеріс жасаған ақын. Қазақ әдебиетіндегі орны бөлек екені сөзсіз», - деді Қазақстан Жазушылар одағының Абай облыстық филиалының төрағасы Мерей Қарт.

Тыныштықбек Әбдікәрімұлы Қазақстан Жазушылар Одағының мүшесі. Қаламгердің «Ақшам хаттары», «Ырауан», «Алқоңыр дүние», «Бесінші маусым жұпары» атты жыр жинақтарының, Қазақтың ұлттық дүниетанымы арқылы өзінше саралап-сараптауға тырысқан «Қас Сақ Аңқымасы» атты еңбектері және басқа да шығармалары жарық көрген.

Тағыда оқыңыз

Семейдегі Абай мұражайының Сіз білмейтін құпиялары қандай?Бүгін қазақтың әйгілі актері, режиссер Шәкен Аймановтың туған күні Шәкәрім шаңырағы – Абай елінің рухани қара шаңырағы!АБАЙ ОБЛЫСЫ: ҚАЛА МЕН АУДАН ӘКІМДЕРІНІҢ РЕЙТИНГІ Мемлекет басшысы Қасым-Жомарт Тоқаевтың VIII сайланған Парламенттің бірінші сессиясының ашылуында сөйлеген сөзі

Бізге ақпарат жолдаңыз Телеграмдағы каналымыз

Мерейлі жасқа толған ақынға құрмет көрсетілді

Пікірлер (0)