Робототехникадан Орталық Азия чемпионатында рекордты көрсеткіш көрсеткен «Ro-Alemi» құрама командасы халықаралық чемпионатқа аттанады. Чемпионат 14-16 наурыз күндері Сингапур мемлекетінде өтеді.

Команда құрамы «БІЛІМ-ИННОВАЦИЯ» лицей оқушылары: Айдмұхамед Табараков, Дархан Мамадилов, Жанарыс Ардахов, Арыстан Ибрагим, №22 мектеп-лицей оқушылары: Əділжан Қабыкенов, Азат Сапаралы, Жəнібек Абдукəрімов, Мейірлан Айтимов.

Қатысушылар үш кезеңнен тұратын чемпионатта FIRST LEGO League Challenge бағыты бойынша тапсырмалар орындайды. Сонымен қатар «Ro-Alemi» құрама командасы PIT зонада қазақ халқының ұлттық құндылықтарын көрсету мақсатында роботтардың асық ату ойынын көрсетпек.

Айта кетейік, ақпан айында «Central Asia FIRST Championship 2024» робототехникадан халықаралық чемпионат өтті. Роботтар ойыны құзыретінде «Ro-Alemi» құрама командасы 100 команда ішінен рекордты көрсеткіш көрсетіп, жеке есепте І орын иеленді. Барлық бағыт қорытындысы бойынша жалпы есепте ІІ орын иеленді.