Абай облысының әкімі Берік Уәли Семей қаласындағы қоғамдық кеңістіктерді аралап, алдағы уақытта шаһарды абаттандыру бағытында қолға алынатын жобалармен танысты.

Аймақ басшысы Бейбітшілік аралындағы этноауылда, спорт аймағында, балалар теміржолында, Мәңгілік Ел көшесіндегі Арбатта, дәрігерлер скверінде, сол жағалаудағы көпір астындағы қоғамдық кеңістікте, Мұхтар Әуезов атындағы алаңда болды.

Қала басшысы облыс әкіміне шаһардағы қоғамдық кеңістіктердің қазіргі жағдайы туралы баяндады. Өңір басшысы әсіресе, қаланың тарихи нышандарының бірі саналатын балалар теміржолына ерекше көңіл бөлді. Бұл нысан жаңғыртудан өткеннен кейін жыл бойы, үздіксіз жұмыс істейтін болды.

Облыс әкімі бұл нысанның мүмкіндігін ұлғайтып, теміржолдың шақырымын ұзартуды тапсырды. Арал аумағын кәрі, сынған, құлаған ағаштардан тазартып, жаңа көшеттер отырғызып, тәртіпке келтіруді жүктеді.

Облыс әкімі қоғамдық кеңістіктерді абаттандыру кезінде қолайлылығын ғана емес, қауіпсіздік мәселесін де ескеру қажеттігін айтты. Қала тұрғындары жиі келетін Бейбітшілік аралына полиция және медициналық бекеттер орнатуды тапсырды.