Қала әкімі коммуналдық қызметтердің жұмысымен танысты
Семей қаласының әкімі Талғат Мұратов «Зеленстрой Семей» және «Семей Тазалық» компанияларына барып, техникалардың жағдайын тексерді. Бұл кәсіпорындар қаланы таза ұстау, санитарлық жұмыстар жүргізу, абаттандыру және көгалдандырумен айналысады.
Тексеріс барысында қала әкімі коммуналдық қызметтердің қысқы мезгілдегі жұмысының қарқынын бағалап, қар шығару мен көктемгі санитарлық тазалыққа дайындық барысын пысықтады.
«Қаланы күтіп ұстау кезінде коммуналдық қызметтердің жұмысы маңызды. Компанияға келгенде, барлық техника бір жерде тұрған жоқ, оның басым бөлігі қаланы қардан тазарту жұмыстарына жұмылдырылған. Бұл – үздіксіз жүргізіліп жатқан жұмыс. Қала тазалығы – басты назарымызда», – деді әкім.
Бүгінде «Зеленстрой Семей» ЖШС-інде 100-ге жуық арнайы техника мен 330-дан астам қызметкер еңбек етуде. Ал 2011 жылы құрылған «Семей Тазалық» компаниясында 200-ден астам азамат жұмыс істейді. Сонымен қатар, «Семей Тазалық» қатты тұрмыстық қалдықтарды шығару жұмыстарын атқарады.
Сонымен қатар су тасқынының алдын алу үшін қосымша инертті материалдар дайындалуда. Ал алдағы көгалдандыру маусымына орай жылыжайларда гүл көшеттері өсіріліп жатыр.
Күн жылыған сәтте қалада санитарлық тазалау жұмыстары басталатынын ескертеміз. Жұмыстардың барлығы қаланың тазалығы мен экологиялық жағдайын жақсартуға бағытталған.